‘കൊന്ത’ എന്ന ജപമാല പ്രാർത്ഥനയ്ക്ക് ഇന്നത്തെ രൂപം കൈവന്നത് വി. ഡൊമിനിക്ക് വഴിയാണ്. വാഴ്ത്തപ്പെട്ട അലൻ ഡി ലാറേഷ്, വി. ഡൊമിനിക്കിന് എങ്ങനെയാണ് ഇത് ലഭിച്ചതെന്ന് “പരിശുദ്ധ ജപമാലയുടെ പ്രാധാന്യവും മനോഹാരിതയും” എന്ന ഗ്രന്ഥത്തിൽ വിശദീകരിക്കുന്നുണ്ട്.
പാഷണ്ഡികൾക്ക് എതിരെ പോരാടിയ വിശുദ്ധ ഡൊമിനിക് ടോലോസിനടുത്തുള്ള ഒരു വനത്തിലിരുന്ന് മൂന്ന് ദിനരാത്രങ്ങൾ ഇടവിടാതെ പ്രാർത്ഥിക്കുകയാണ്. കഠോരമായ പ്രായശ്ചിത്ത പ്രവർത്തികൾ ചെയ്ത് അവരുടെ പാപങ്ങൾക്ക് മാപ്പ് നൽകണമേയെന്ന് വിശുദ്ധൻ അപേക്ഷിച്ചു. ഈ സമയം മൂന്ന് മാലാഖമാരോടൊപ്പം മാതാവ് വിശുദ്ധന് പ്രത്യക്ഷപ്പെട്ട് ചോദിച്ചു. പ്രിയപ്പെട്ട ഡൊമിനിക്ക് ലോകത്തെ നവീകരിക്കുവാനായി ഏത് ആയുധം ഉപയോഗിക്കണമെന്നാണ് പരിശുദ്ധ ത്രിത്വം ആഗ്രഹിക്കുന്നത് എന്നു നിനക്കറിയാമോ?” ഡൊമിനിക്ക് പറഞ്ഞു: “എന്റെ മാതാവേ, എന്നെക്കാൾ കൂടുതലായി അങ്ങേക്ക് അത് അറിയാം. കാരണം അങ്ങേ പുത്രനായ യേശുക്രിസ്തു കഴിഞ്ഞാൽ പിന്നെ തങ്ങളുടെ രക്ഷയുടെ മുഖ്യ ഉപകരണം എല്ലായ്‌പ്പോഴും അങ്ങുതന്നെയാണ്. മാതാവ് പറഞ്ഞു: ശത്രുവിനെ അടിച്ചു തകർക്കുന്ന കൂടം, പുതിയ നിയമത്തിന്റെ അടിസ്ഥാനശിലയായ മലാലയുടെ കീർത്തനമാണ്. അവരുടെ കഠിനഹൃദയം മാറുവാനും അവർ സ്വർഗ്ഗത്തിലെത്തുവാനും നീ ആഗ്രഹിക്കുന്നെങ്കിൽ എന്റെ കീർത്തനം പ്രകീർത്തിക്കുക.” ആശ്വാസചിത്തനായ വി. ഡൊമിനിക്ക് ഉടൻ തന്നെ എഴുന്നേറ്റ് കത്തീഡ്രലിലേക്ക് പോയി ജപമാലയുടെ പ്രാധാന്യത്തെപ്പറ്റി പ്രസംഗിച്ചു.
ചുരുക്കി പറഞ്ഞാൽ ആൽബി ജെനെസിസ് എന്ന സ്ഥലത്തുവച്ച് മാതാവ് വിശുദ്ധ ഡൊമിനിക്കിന് പ്രത്യക്ഷപ്പെടുകയും ഒരു കൊന്ത നൽകിക്കൊണ്ട് കൊന്തയുടെ പ്രാധാന്യത്തെപ്പറ്റി പ്രസംഗിക്കാൻ ആവശ്യപ്പെട്ടെന്നുമാണ് ഇതിന്റെ പാരമ്പര്യം. കൊന്തയെന്ന പോർച്ചുഗീസ് വാക്കിന്റെ അർത്ഥം എണ്ണൽ, കണക്കു കൂട്ടൽ എന്നൊക്കെയാണ്.
ഏതായാലും ഇത് ഒരു വ്യക്തിയുടെ മാത്രം സംഭാവനയല്ല. ജപമാലയുടെ ചില ഭാഗം വിശുദ്ധ ഡൊമിനിക്കിനു മുമ്പ് ഉണ്ടായിരുന്നു. മറ്റു ചില ഭാഗം കാലക്രമത്തിൽ കൂട്ടിച്ചേർക്കപ്പെട്ടതുമാണ്. പലരുടെ കരങ്ങളിലൂടെയാണ് ജപമാല അതിന്റെ പൂർണ്ണരൂപം കൈവരിച്ചത്.
രക്ഷാകര പ്രവൃത്തിയായ ആരാധനക്രമവും (വിശുദ്ധ കുർബാന എന്ന ബലി) രക്ഷാകരധ്യാനമായ ജപമാലയും തമ്മിലുള്ള ബന്ധത്തിന്റെ ഏറ്റം സുന്ദരവശം, ഉചിതമായ വിധത്തിലുള്ള ജപമാലയർപ്പണം വിശുദ്ധ കുർബാനയർപ്പണത്തെ ഏറെ ഫലവത്താക്കും. ഇതേപ്പറ്റി വിശുദ്ധ ജോൺ പോൾ പാപ്പയുടെ പ്രബോധനം വളരെ പ്രധാനപ്പെട്ടതാണ്: “ആരാധനക്രമം ക്രിസ്തുവിന്റെ സഭയുടെ പ്രവർത്തനവും പരമോന്നതമായ രക്ഷാകര പ്രവൃത്തിയുമാണെങ്കിൽ, മറിയത്തോടൊപ്പം ക്രിസ്തുവിനെ ധ്യാനിക്കുന്ന ജപമാല രക്ഷാകര ധ്യാനമാണ്. രക്ഷകന്റെ ജീവിത രഹസ്യങ്ങളിൽ ആമഗ്നരാവുന്നതിലൂടെ, അവിടുന്നു പ്രവർത്തിച്ചതും, ഇന്ന് ആരാധനക്രമത്തിലൂടെ സാക്ഷാത്കരിക്കുന്നതും നാ ആഴത്തിൽ സ്വന്തമാക്കുകയും നമ്മുടെ ജീവിതത്തെ രൂപപ്പെടുത്തുകയും ചെയ്യുന്നു. (കന്യകാമറിയത്തിന്റെ ജപമാല – 13, 2002 ഒക്ടോബർ), കത്തോലിക്കാ സഭയിലേയ്ക്ക് തിരികെവരാനുണ്ടായ കാരണത്തെപ്പറ്റി കാർഡിനൽ ന്യൂമാൻ പറയുന്നു “അമ്മയില്ലാത്ത ഭവനത്തിൽ ജീവിക്കാൻ ഞാൻ ആഗ്രഹിക്കുന്നില്ല.
ഒരു വലിയ മരിയ ഭക്തനായിരുന്നു. പന്ത്രണ്ടാം പീയൂസ് മാർപാപ്പ. മാർപാപ്പയാകുന്നതിനു മുമ്പ് പച്ചേലി എന്ന പേരിലാണ് അദ്ദേഹം അറിയപ്പെട്ടിരുന്നത്. യുദ്ധകാലത്ത് നിരീശ്വരവാദികളായ ഒരുപറ്റം അക്രമകാരികൾ അദ്ദേഹത്തിന്റെ മുറിയിൽ കയറി. അവിടെയുള്ള വിലപിടിപ്പുള്ള സാധനങ്ങളെല്ലാം അവർ വാരിക്കൂട്ടി. കത്തോലിക്കാ വിശ്വാസം ഉപേക്ഷിക്കുകയാണെങ്കിൽ വെറുതെ വിടാമെന്നും, ഇല്ലെങ്കിൽ വെടിവെച്ചു കൊല്ലുമെന്നും അവർ ഭീക്ഷണിപ്പെടുത്തി. അദ്ദേഹം ആശങ്കാകുലനായില്ല. വിശ്വാസത്തിനുവേണ്ടി മരണം വരിക്കാൻ അദ്ദേഹം സന്നദ്ധനായി. ഉടൻ തന്നെ അദ്ദേഹം പോക്കറ്റിൽ നിന്ന് ഒരു ജപമാലയും, ഒരു കുരിശുരൂപവും എടുത്ത് ചുംബിച്ചുകൊണ്ട് ധൈര്യവാനായി പറഞ്ഞു: “നിങ്ങൾ വെടിവെയ്ക്കാൻ തയ്യാറുണ്ടെങ്കിൽ എന്റെ ചങ്കിനുനേരെ വെടിവെയ്ക്കുക.” ജപമാലയും കയ്യിലേന്തി മുട്ടിന്മേൽ നിന്ന് പച്ചേലിയെ വെടിവെയ്ക്കാൻ അവർക്കു കഴിഞ്ഞില്ല. ഈ മരിയ ഭക്തൻ പിന്നീട് പന്ത്രണ്ടാം പീയൂസ് മാർപാപ്പ എന്ന പേരിൽ പത്രോസിന്റെ സിംഹാസനം വരെയെത്തി. അദ്ദേഹമാണ് പരിശുദ്ധ കന്യകാമറിയത്തിന്റെ സ്വർഗ്ഗാരോപണം വിശ്വാസ സത്യമായി പ്രഖ്യാപിച്ചത്.
(കടപ്പാട്: ജപമാലയുടെ അർത്ഥങ്ങൾ; ഫാദർ സേവ്യർ ഖാൻ വട്ടായിൽ)
പ്രാർത്ഥന
നിത്യസ്നേഹമായ ഈശോയെ, പരിശുദ്ധ മറിയത്തെ ഞങ്ങൾക്കെല്ലാവർക്കും അഭയവും ആശ്രയവും അമ്മയുമായി നൽകിയതിനെയോർത്ത് ഞങ്ങൾ അങ്ങേക്ക് നന്ദി പറയുന്നു. ഈശോ നാഥാ അങ്ങേയ്ക്ക് ഏറെ പ്രിയപ്പെട്ട പരിശുദ്ധ അമ്മ വഴി അങ്ങ് ഞങ്ങളിലേക്ക് ചൊരിയുന്ന അനുഗ്രഹങ്ങൾ അനവധിയാണല്ലോ. അതിനാൽ വിശുദ്ധ ഡൊമിനിക്കിനെപ്പോലെ ജപമാല ചൊല്ലി പ്രാർത്ഥിച്ചുകൊണ്ട് അനേകരെ മാനസാന്തരത്തിൽ എത്തിക്കുവാനും അങ്ങയിലേക്കടുപ്പിക്കുവാനും ഞങ്ങളെ ശക്തരാകണമേ. അങ്ങനെ ഞങ്ങൾവഴി ലോകം മുഴുവൻ അങ്ങയുടെ മഹത്വം വെളിപ്പെടുത്തുവാൻ അങ്ങ് കരുണയുണ്ടാകണമേ.
ആമേൻ.
വിശുദ്ധ ഡൊമിനിക്കേ, ഞങ്ങൾക്കുവേണ്ടി അപേക്ഷിക്കണമേ.
PDM – Ruha Mount Attappadi
