റൂഹാ മൗണ്ട്: കത്തോലിക്കാസഭ സമാധാനത്തിന്റെ പുതുയുഗപ്പിറവിയിലാണെന്ന് കർദ്ദിനാൾ മാർ ജോർജ് ആലഞ്ചേരി. നവീകരിച്ച കുർബാന ക്രമവും ഏകീകൃത അർപ്പണരീതിയും നിലവിൽ വന്ന ആരാധനക്രമവത്സരത്തിന്റെ ആദ്യദിനമായ ഇന്നലെ സഭയുടെ ആസ്ഥാന കാര്യാലയമായ കാക്കനാട് മൗണ്ട് സെന്റ് തോമസിൽ ദിവ്യബലി മദ്ധ്യേ നൽകിയ സന്ദേശത്തിലാണ് അഭിവന്ദ്യ പിതാവ് ഈ കാര്യം വ്യക്തമാക്കിയത്.
വിശുദ്ധ കുർബാന ദൈവം നമുക്കു നൽകിയ വലിയ ദാനങ്ങളിൽ ഒന്നാണെന്നും അതിനാൽത്തന്നെ ഐക്യവും സമാധാനവും ഉണ്ടാകണമെന്നുള്ളത് ദൈവത്തിന്റെ തീരുമാനമാണെന്നും അഭിവന്ദ്യ പിതാവ് ഓർമിപ്പിച്ചു. കൂരിയ ചാൻസിലർ റവ. ഡോ. വിൻസന്റ് ചെറുവത്തൂർ, ലിറ്റർജി കമ്മീഷൻ സെക്രട്ടറി റവ. ഡോ. ഫ്രാൻസിസ് പിട്ടാപ്പിള്ളിൽ, കൂരിയായിലെ മറ്റു വൈദികർ എന്നിവർ സഹകാർമികരായിരുന്നു.
